[English version]

Thigibh Cruinn Còmhla air Disathairne 9 Cèitean airson an latha coimhearsnachd mu dheireadh againn san t-sreath seo ann an 2025/26. Bidh fàilte chridheil air a h-uile duine, le gnìomhachdan airson gach aois agus gach ìre de dh’fhileantas.

An turas seo bidh sinn ann an àite ùr – ionad coimhearsnachd the Heart of Newhaven – ach mar a thachair nar tachartasan Cruinn Còmhla eile, bidh sinn a’ ruith chlasaichean Gàidhlig (faicibh gu h-ìosal airson àite a ghlèidheadh) agus cuideachd gnìomhachdan spòrsail eile, agus cafaidh airson strùpag agus cabadaich – tuilleadh fiosrachaidh gu h-ìosal.

Thigibh ann gus coinneachadh ri daoine bhon choimhearsnachd, gus Gàidhlig a bhruidhinn agus ionnsachadh, agus gus taic a chumail ris an iomairt airson Ionad Gàidhlig ann an Dùn Èideann!

Cruinn Còmhla · Disthairne 9 Cèitean 2026 10.00 – 16.00 · Ionad coimhearsnachd Heart of Newhaven, 4-6 Main Street, Dùn Èideann EH6 4HY

Clasaichean Gàidhlig

Aig Cruinn Còmhla bidh sinn a’ ruith chlasaichean Gàidhlig aig dà ìre eadar-dhealaichte (eadar-mheadheanach ìre ìosal agus eadar-mheadhanach ìre àrd), bho 10.00 – 12.30.

Cosgais £15 (lasachadh £12). Airson àite a ghlèidheadh, cuiribh post-d gu: ionaddhuneideann@gmail.com

Eadar-mheadhanach (ìre ìosal)

Bidh an clas seo freagarrach do dh’oileanaich aig a bheil tuigse chuibheasach air a’ chànan, agus a tha ag obair gus am fileantas agus eòlas a leasachadh. Faicibh ìre B1, Comasan Labhairt ann an Gàidhlig airson barrachd fiosrachaidh.

Taoitear: Andrew Gourlay

Eadar-mheadhanach (àrd-ìre)

Bidh an clas seo freagarrach do dh’oileanaich a tha air grunn chlasaichean Gàidhlig a dhèanamh, aig a bheil tuigse mhath air a’ chànan, agus a tha ag obair air a bhith ga bruidhinn nas misneachaile. Faicibh ìre B2, Comasan Labhairt ann an Gàidhlig airson barrachd fiosrachaidh.

Taoitear: Raonaid Alcorn

Gnìomhachdan eile

Co-dhiù am bi sibh a’ gabhail clas Gàidhlig no nach bi, nach tig sibh còmhla rinn aig a’ chafaidh fad latha – le tì, cofaidh, cèicean agus briosgaidean – agus cothrom ur cuid Gàidhlig a chleachdadh ann an co-theacsa neo-fhoirmeil.

Thigibh ann cuideachd airson leabhar a cheannach bhon bhùth bheag aig Comhairle nan Leabhraichean agus airson fiosrachadh air gnìomhachdan agus buidhnean Gàidhlig ann an Dùn Èideann. Bidh cothrom ann cuideachd barrachd fhaighinn a-mach mun iomairt gus Ionad Gàidhlig a chruthachadh ann an Dùn Èideann – agus tighinn an-sàs còmhla rinn mar bhall!

Bidh cuideachd raon de dhiofar ghnìomhachdan ann a bhios ag amas air leigeil le daoine barrachd fhaighinn a-mach mun Ghàidhlig, le luchd-tòiseachaidh beagan Gàidhlig a thogail, le luchd-ionnsachaidh an sgilean a thaobh briathrachas Gàidhlig, agus an eòlas agus tuigse, a leasachadh, agus cothroman còmhraidh a thoirt seachad – agus le luchd-fileanta na Gàidhlig pàirt a ghabhail ann an gnìomhachdan coimhearsnachd.

(Cha bhi ach briosgaidean is cèicean rim faighinn aig a’ chafaidh, ach faodadh sibh na ceapairean agaibh fhèin a thoirt leibh airson lòn, agus bidh cuideachd cothrom ann brot a cheannach bhon bhuidheann Saturday Soup a tha air a ruith air le saor-thoilich Diùc Dhùn Èideann eadar 12.00 is 14.30).

Gheibh sibh an clàr-ama gu h-ìosal (dh’fhaodadh gun tèid atharraichean beaga a dhèanamh air a’ phrògram fhathast).

Clàr-ama an latha

Sgilean Gàidhlig Bunaiteach: seiseanan gus blasad den Ghàidhlig a thoirt seachad, no sgilean anns a’ Ghàidhlig a leasachadh.

• Seisean inntrigidh don Ghàidhlig: 10.00 – 10.45
  A bheil thu gun Ghàidhlig sam bith no le glè bheag de Ghàidhlig? Seo cothrom beagan fhaclan agus abairtean simplidh ionnsachadh. Le Judith Watson

• Litreachadh is fuaimneachadh na Gàidhlig: 11.00 – 10.45
  Is tric a bhios fuaimneachadh agus litreachadh fhaclan Gàidhlig na bhacadh mòr do luchd-ionnsachaidh. Faigh comhairle agus molaidhean gus do chuideachadh air an t-slighe ionnsachaidh agaibh anns a’ Ghàidhlig. Leis an Oll. Wilson MacLeòid. 

Buidheann fighe: 10.00 – 12.00Cothrom do dh’fhigheadaireanpàirt a ghabhail anns a’ buidheann chunbhalach aig Heart of Newhaven, Knit & Natter – thoir leat d’ fhighe!

Cothrom Còmhraidh: 11.00 – 12.00 & 13.15 – 14.15
Cothrom do chuid Gàidhlig a chleachdadh ann an co-theacsa neo-fhoirmeil. Le Niall MacGriogair, tidsear Gàidhlig agus neach-rannsachaidh.

Cròileagan Dhùn Èideann: 11.00 – 12.30
Ealain spòrsail ‘drop in’airson clann fo aois sgoile, le Cròileagan Dhùn Èideann. Chan eil Gàidhlig riatanach.

Còisir Dhùn Èideann: .50 – 1.10
Thigibh a chluinntinn Còisir Dhùn Èideann anns an talla, agus faighibh cothrom seinn còmhla riutha cuideachd!

Leasachadh na Gàidhlig ann an Dùn Èideann – tha ur guth cudromach: 12.00 – 13.00
Tha sgioba na Gàidhlig aig Comhairle Baile Dhùn Èideann ag obair le sgoiltean, teaghlaichean, coimhearsnachdan agus buidhnean gus na h-ath-cheumannan airson foghlam Gàidhlig anns a’ bhaile a dhealbhachadh. Tha na beachdan agaibh cudromach dhuinn – nach tig sibh a chur ur barailean ris a’ chòmhradh seo?

Thig is Feuch!: 13.15 – 14.15
Feuch ionnsramaid ùr, le Fèis Dhùn Èideann, a’ bhuidheann a bhios a’ tairgse prògraim de dh’oideachas ann an ceòl traidiseanta do dh’ òigridh Dhùn Èideann. Fidheall, giotàr, fìdeag & bogsa.

Seinnidh Sinn: 14.15 – 15.15
Tog òran ùr – seisean seinn neo-fhoirmeil le Catriona NicNeacail bhon chearcall sheinn, Seinnidh Sinn.

Ath-shealladh air Polaris: bàrdachd, ceòl & am pròiseas cruthachail: 13.15 – 14.15
Thigibh còmhla ris a’ bhàrd is seinneadair-sgrìobhadair Ghàidhlig Marcas Mac an Tuairneir agus e a’ coimhead air ais air a chruinneachadh bàrdachd aige Polaris a thàinig a-mach ann an 2022. Roinnidh Marcas beachdan air a phròiseas cruthachail – mar a thàinig an glasadh-sluaigh, a ghaol air eachdraidh, agus co-chomann luchd-cruthachaidh mion-chànanach bho air feadh Eileanan a’ Chuain Siar còmhla gus cruthachalachd ùr fhadadh. Bidh measgachadh de bhàrdachd, ceòl agus naidheachdan san taisbeanadh neo-fhoirmeil seo, a spreigeas daoine eile a tha ag obair, no an dùil a bhith ag obair, sna h-ealain chruthachail Ghàidhlig.

Eachdraidh na Gàidhlig ann an Dùn Èideann: 14.15 – 15.15
Ged a tha cuid den bheachd nach eil ceangal làidir aig a’ Ghàidhlig ri Dùn Èideann, tha an cànan air a bhith an làthair anns a’ bhaile airson còrr air mìle bliadhna. Faighibh a-mach mu eachdraidh na Gàidhlig sa bhaile thar nan linntean. Leis an Oll. Wilson MacLeòid.

Buidheann Leughaidh: 14.30 – 15.30
Buidheann Leughaidh airson luchd-ionnsachaidh aig ìre eadar-mheadhanach. Air a chur air dòigh leis a’ bhuidheann leughaidh Gàidhlig aig u3a.

Cruinn Còmhla · Disthairne 9 Cèitean 2026 10.00 – 16.00 · Ionad coimhearsnachd Heart of Newhaven, 4-6 Main Street, Dùn Èideann EH6 4HY