[English version]

Thigibh Cruinn Còmhla air Disathairne 28 Gearran airson latha coimhearsnachd mar phàirt de Sheachdain na Gàidhlig 2026! Bidh fàilte chridheil air a h-uile duine, le gnìomhachdan airson gach aois agus gach ìre de dh’fhileantas.

Bidh seo an treas latha coimhearsnachd ann an sreath de cheithir air an cumail le Ionad Gàidhlig Dhùn Èideann ann an 2025/26 agus, mar a thachair aig Cruinn Còmhla san t-Samhain agus san Fhaoilleach, air 28 Gearran bidh sinn a’ ruith chlasaichean Gàidhlig (faicibh gu h-ìosal airson àite a ghlèidheadh) agus bidh cuideachd gnìomhachdan spòrsail eile ann, cho math ri cafaidh snog airson strùpag agus cabadaich – tuilleadh fiosrachaidh gu h-ìosal.

Thigibh ann gus coinneachadh ri daoine bhon choimhearsnachd, gus Gàidhlig a bhruidhinn agus ionnsachadh, agus gus taic a chumail ris an iomairt airson Ionad Gàidhlig ann an Dùn Èideann!

Clasaichean Gàidhlig

Aig Cruinn Còmhla bidh sinn a’ ruith chlasaichean Gàidhlig aig trì ìrean eadar-dhealaichte, bho 10.00 – 12.30.

Cosgais £15 (lasachadh £12). Airson àite a ghlèidheadh, cuiribh post-d gu: ionaddhuneideann@gmail.com

Post Beginners

Bidh an clas seo freagarrach do dh’oileanaich aig a bheil tuigse bhunaiteach air gràmar na Gàidhlig, sgilean còmhraidh simplidh agus a tha deònach Gàidhlig a bhruidhinn. Faicibh ìre A2, Comasan Labhairt ann an Gàidhlig airson barrachd fiosrachaidh.

Taoitear: Rona Lawson

Eadar-mheadhanach (ìre ìosal)

Bidh an clas seo freagarrach do dh’oileanaich aig a bheil tuigse chuibheasach air a’ chànan, agus a tha ag obair gus am fileantas agus eòlas a leasachadh.

Faicibh ìre B1, Comasan Labhairt ann an Gàidhlig airson barrachd fiosrachaidh.

Taoitear: Andrew Gourlay

Eadar-mheadhanach (àrd-ìre)

Bidh an clas seo freagarrach do dh’oileanaich a tha air grunn chlasaichean Gàidhlig a dhèanamh, aig a bheil tuigse mhath air a’ chànan, agus a tha ag obair air a bhith ga bruidhinn nas misneachaile. 

Faicibh ìre B2, Comasan Labhairt ann an Gàidhlig airson barrachd fiosrachaidh.

Taoitear: ri dhearbhadh

Cruinn Còmhla · Disathairne 28 Gearran 2026 10.00 – 16.00 · Darroch, 7 Gillespie Street, Edinburgh EH3 9NH

Gnìomhachdan eile

Co-dhiù am bi sibh a’ gabhail clas Gàidhlig no nach bi, nach tig sibh còmhla rinn aig a’ chafaidh fad latha – le tì, cofaidh, cèicean agus briosgaidean – agus ceòl, geamannan bùird, agus cothrom ur cuid Gàidhlig a chleachdadh ann an co-theacsa neo-fhoirmeil.

Bidh cothrom ann cuideachd barrachd fhaighinn a-mach mun iomairt gus Ionad Gàidhlig a chruthachadh ann an Dùn Èideann – agus tighinn an sàs còmhla rinn mar bhall!

Bidh cuideachd raon de dhiofar ghnìomhachdan ann a bhios ag amas air leigeil le luchd-ionnsachaidh an sgilean a thaobh briathrachas Gàidhlig, gràmar na Gàidhlig agus còmhradh sa Ghàidhlig a leasachadh – agus le luchd-fileanta na Gàidhlig pàirt a ghabhail ann an gnìomhachdan coimhearsnachd.

Thèid am prògram slàn fhoillseachadh a dh’aithghearr – ach cumaibh sùil a-mach airson:

• Cothrom còmhraidh: seisean còmhraidh neo-fhoirmeil
• Seinnidh Sinn – cearcall seinn
• Bùth bheag le Comhairle nan Leabhraichean
• Sgoil Fhonn: Bùth-obrachd Seinn nan Salm
• Ealain do dhaoine beaga, le Cròileagan Dhùn Èideann

Agus mòran rudan eile….

Cruinn Còmhla · Disathairne 28 Gearran 2026 10.00 – 16.00 · Darroch, 7 Sràid Ghilleasbaig, Dùn Èideann EH3 9NH